n Samir Tighzert

» Catégorie : Tamedyazt


Aɣrum d usebsi d wayyur (asefru)

Commentaires » 0

 Sɣur Nizar Qebbani -1954

Tasuqilt (si taεrabt): Samir Tighzert

Tusa-yaɣ-d tikti ad nessuqel asefru-ya n Nizar Qebbani (1923- 1998), amedyaz asuri yettwassnen, acku nwala-t igerrez yerna mucaε deg umaḍal ; di tilawt aṭas i t-yerran ɣer tutlayin-nsen seg wakken ameskar iwet-d deg-s s leqseḥ deg yir tikli i d-wwin Waεraben d yimslelmen s umata i yeṭṭfen ala deg wansayen iqburen akken bɣun ilin, rnan zzin s uεrur i tɣerma mi d-lhan ala d ddin. Asmi t-yura ssawḍen armi t-sbedden ɣer teɣdemt, yuɣ lḥal amedyaz-a yella icaε belli d arnaflas[1] i yella ; ma deg uparlman n tmurt-is kkren-d ula d wid i d-yessutren ad s-kksen tiɣelnit tasurit (nationalité), maca ur teffiɣ ara akken.

GT : Γer tagara n weḍris, ad tt-afem belli asefru-ya yella wanda i ɣ-yerza ula d nekni s Yimaziɣen.

 

Aɣrum d usebsi d wayyur

nizar2

Deg Usammar, yal mi d-ilul wayyur
Lesquf-nni mellulen akk tettawi-ten tnafa
Seddaw ikemcan urelluc
Medden imir ttaǧǧan tiḥuna, ttruḥun d tirbuyaε
Akken ad mmagren wayyur
Ttawin yid-sen aɣrum…
[ d bu-tqsiḍin… s ixf n wedrar
D kra ilaqen i ssekṛa
Dɣa ttaɣen zznuzun lexyalat
D tugniwin
Γas ma mmuten, ad yidir kan wayyur

***
Acu txeddem teḥbult n ṭṭya
Di tmurt-iw !
Tamurt n lanbeyya
Tamurt igellilen
Iteffẓen tiḥcinin…  imzenza n ssekṛa
Acu yexdem deg-neɣ wayyur
Armi ɣ-truḥ nnefxa-nni n zik
Nuɣal nessutur seg igenni…
Acu ara d-yefk yigenni
I imeksal ur nezmir ?
Ttuɣalen d lmeyytin
Ma yedder wayyur…
Senguguyen deg iẓekwan n lawleyya
Wiss m’ad sen-d-fken kra n ṛṛuz, neɣ igerdan…
Iẓekwan n lawleyya…
Ssewsiεin deg tẓerbiyin sut rrqem ucbiḥ
Ttawin-d lewqat s lεefyun-nni iwmi semman
Lmektub… Lweεd n Rebbi
Di tmurt-iw
Tamurt igellilen

***

Anwa facal, neɣ anefsuy
I ɣ-izeddɣen yal ma teflali-d tafat
Imi tiẓerbiyin… d luluf n tqecwalin…
Lkisan n latay, d igerdan, zerεen di tɣaltin
Di tmurt-iw
Anda ttrun wat nneyya
Ttẓallan
Zennun
Ttεicen s lettkal
Segmi ttεicen s lettkal
Rennun ssawalen i wayyur :
Ay ayyur,
A taεwint n lwizz
D usebsi d yiḍes
Ay illu n rrxam iεellqen
A taɣawsa ur nettwaman
Ili-yaɣ d agazu n lwizz deg Usammar
I imlyan n wid ur nettḥulfu s kra

***
Deg uḍan Usammar
Ma ifat yekmel wayyur
Asammar yeḍḍeqqir kra yesεa d nnif
Neɣ d lḥir
Imi d imelyan n lɣaci yettazzalen
[akken ḥafi
Yettamnen s tuɣin n rebεa tlawin
D wass n lḥisab
Imelyan-nni ur d-nettmagar aɣrum
Ala deg targit…
Izeddɣen deg yiḍ ixxamen n tusut
Werǧin ssinen amek iga usafar
D lǧettat i ttlusen i tafat
Di tmurt-iw… anda ttrun wungifen
Ard mmten seg imeṭṭi…
Yal mi ten-thuzz ssnitra s « llayali[2]»
Lmut-nni iwmi neqqar deg Usmmar
Ccna d wuḍan
Di tmurt-iw
Tamurt igellilen
Anda nettarra ifeẓ i icewwiqen ur nettfakka
Aṭṭan-nni yessengren Asammar
D icewwiqen ur nettfakka…
Deg Usammar-nneɣ iteffẓen… amezruy
Tirga timeksal
D tmucuha yeεyan
Asammar-nneɣ ur nettnadi tasḍa[3]
Ala ɣur Abu Zayd Lhilali[4]

                                                                                                                                                                                                       Facebook/Timuɣliwin


[1] Arnaflas : d war taflest ur nettamen s Rebbi (incroyant, athée).

[2] « Ya lili », (ay iḍ) d awal i d-yettuɣalen s tuget deg ccna n Waεraben usammar, yuɣal ɣur-sen d azamul n tesmeḍ n wul, εawaz di ttbernat d unadi n zzhu war tilisa (Tazmilt n umsuɣel)

[3] Tasḍa (mačči taḍsa), taḍsa n wasaḍ, n isaṭṭen : d ayen i d-yesbeyyin tabɣest n yiwen di kra n umennuɣ, n umihi neɣ ayen akk yeḥwaǧen leqder mi t-id-iḥella (héroïsme).

[4] Abu Zayd Lhilali d yiwen seg imeqqranen n Banu Hilal i tumeṛ ddula Tafaṭimit ad d-yeṭṭixer si Maṣer deg tallit-nni tanammast, dɣa yunag-d ɣer tama i Imaziɣen s trebbuyaε-is n Waεraben armi i d-yessegra tixessarin meqqren i Imaziɣen n Lezzayer n tura, tugart Iziriyen di lawan-nni, maca ula d Iḥemmadiyen siyn ɣer da, imi ttwassnen ala s uhuddu d tweḥcit deg tuẓin-nsen ɣer temdinin. Imazrayen qqaren-d belli d inig-a d wid i d-iḍefren i ireṣṣan Aεraben s tidet deg wakal amaziɣ, uqbel ad d-awḍen wid i d-ẓẓεen Ispenyulen deg tagara n lqern wis XVI. Dayi Qebbani yebɣa ad d-yini belli Aεraben ur ttzuxxun ala s tilla-nni mi kecmen timura n wiyaḍ, hudden tiɣermiwin, syin kra ur d-yelli (Tazmilt n umsuɣel).

Taḍrist tanaṣlit s taεrabt :

خبز و حشيش و قمر

عندما يولدُ في الشرق القمرْ
فالسطوحُ البيضُ تغفو
تحت أكداس الزَهَرْ
يترك الناسُ الحوانيت و يمضون زُمَرْ
لملاقاةِ القَمَرْ
يحملون الخبزَ .. و الحاكي .. إلى رأس الجبالْ
و معدات الخدَرْ
و يبيعونَ.. و يشرونَ.. خيالْ
و صُوَرْ
و يموتونَ إذا عاش القمر

(القصيدة كاملة)



Must See Places In Paris

Find IP

Tadiwennit akked ucennay Hamid Aït Melloul

Commentaires » 0

Yeffeɣ-d deg uɣmis Tiɣremt (la Cité) ass n 04/12/2016

Yesteqsa-t Maklidir Iɣil Wis

  …………………………………………………..

Ḥamid ayt Mellul d anaẓur i d-tefka taddart n Tgubba i d-yezgan deg tɣiwant n Ticci (Bgayet), d aselmad di tesdawit n Bgayet, damedyaz, yexdem ddeqs n telatin, i mazal ur d-ffiɣent, yesseẓreg-d yiwet n tesfift s wazal-is deg useggas n 2006, yefka azal i tezlit taqbayit, s lecraha i d-yerra tiririt i yesteqsiyen-nneɣ, ḍefret-d ihi tadiwennit-a.

Deg tazawara, anwa i d Lḥamid Ayt Mellul?15204254_1242297445833506_458761245_o

Ḥamid Ayt Mellul, isem-is aḥaqqani Ḥamid Tiɣzert, illul deg taddart n Tgubba, taɣiwant n Ticci. Tura atan d aselmad di Tsadwit n Bagyet, Tasdawit ideg yeɣra yakan netta s yiman-is.

D acu i k-d-yewwin ɣer ccna d tmedyazt?

Ad k-d-iniɣ sseḥ. Segmi lliɣ d aqcic d ameẓyan, ufiɣ-d  agiṭar deg uxxam, ufiɣ-d gma ameqran Akli icennu, ixeddem tizlatin d isefra (ar ass-a mazal-it yessefraw) ; am akken i d-ufiɣ daɣen ala iḍebsiyen n Ayt Mengellat, d Sliman Σazem d wiyaḍ i ten-yecban… d aya i yi-d-yewwin ɣer ubrid-a n ccna d tmedyazt.

Γef acu tesfraweḍ:

Tizilit tamezwarut i xedmeɣ, rriɣ-tt d tajmilt i Dda Lmulud  At Mεemmer. Lliɣ sεiɣ 14 iseggasen di lεemer-iw. Syin akin, xedmeɣ aṭas n tezlatin d isefra. Ahat ugar n meyya. Ttaruɣ ttarraɣ ɣer ṭṭerf. Cniɣ ɣef tayri, ɣef ddunit d temsirin-is, tikwal daɣen ɣef tsertit.

Tessiẓrgeḍ-d-d deg 2006 yiwet n tesfift, ssin akkin ulac amaynut, tḥebseḍ neɣ d allalen ay ulac ?

Ulamma ttawil ixuṣṣ ad d-iniɣ mačči d win i y-iεeṭṭlen. D abrid n ccna s umata i iweεren. Asiẓreg s webrid aqbuṛ ur yessufuɣ ara ass-ayi, acku tura ɣas in’as yuɣal d ttjaṛa kan. Ma ur tcennuḍ ara i tmeɣra, ur d-tettafeḍ w’ara d-yelhun yid-k ma tebɣiḍ ad txedmeḍ ayen zeddigen.Uɣaleɣ beddelɣ abrid, deg teswiεt ɣer tayeḍ srusuɣ kra n tezlatin deg Internet. Meεna ttxemmimeɣ ad uɣaleɣ  ɣer ustudyu akken ad sskelseɣ tisfifin-iḍen ssya d asawen imi tuɣac llant.

Efk-d tamuɣli-k ɣef liḥala n tezlit taqbaylit n wass-a ?

Zik qqaren anaẓur d lemri n tmetti. Ass-a ccukeɣ lḥala tenneqlab. Ittɣiḍ lḥal imi tikwal d icennayen imeqranen s yiman-nsen i d-yessaṭaren deg uswir-nsen iwakken ad εeǧben i madden. Ass-a di ccna n tqbaylit tella tesmekta (la quantité) meεna ulac ayen yelhan deg tɣara (qualité). Γas akken mazal llan wid icennun ayen zeddigen, ttaεraḍen ad xedmen ayen yelhan.  D acu cukkeɣ lḥal ahat ad ibeddel kra wass, imdanen ad εyun si ccna n tmeɣriwin u ad uɣalen ad nadin ɣef ayen nniḍen, imir ad s-yuɣal wazal i usferu deg tezlit am isegassen-nni n 70 d 80.

Anwi icennayen d yimedyazen iqbayliyen d yiberraniyen i tḥemmleḍ

Ḥemmleɣ s lketra icennayen iqdimen. Ait Menguellet, d Ferḥat Imula uɣur i d-nejreɣ ṣṣenf n tmedyazt i ttaruɣ. Dɣa yessewham lḥal m’ara nmuqel, yiwen am Ferḥat ssnen-t medden d argaz aserti kan, yerna ayen yexdem deg uẓawan(musique) akked isefra d ayen lqayen ur ixeddem menwala. Gar wid i ḥemmelɣ, llan daɣen wiyaḍ si tsuta taneggarut, i umedya ad d-adrɣ Σebbas n At Rzin. Ma d iberraniyen, smeḥsiseɣ i icennayen iqdimen icennun s tefransist. Gar-sen s lketra Joe Dassin d Enrico Macias.

Ma nniɣ-ak Tagguba d acu ara y-id-tiniḍ ?

Tagguba d taddart-iw. Taddart deg i luleɣ. Anda ruḥeɣ ad d-uɣaleɣ ɣur-s.

Ahat yella wacu i tebɣiḍ ad theḍreḍ ur k-id-seqsaɣ ara fella-s ?

Ad cekreɣ s waṭas aɣmis La Cité i d-yefkan tagnit akken ad meslayeɣ ɣef tesfift “Aseggaḍ n lḥut”.

D acu ara sen-tiniḍ i yilemẓiyen d tlemẓiyin-nneɣ ?

Ad sen-iniɣ belli sεan ẓẓher imi d-lulen deg tallit-a n tiknulijit tatrart. Meεna annect-a yerra-ten ttεicen  s waṭas deg ddunit tasugnant kan (le virtuel) ma zemreɣ ad t-id-iniɣ akka. Ad sen-d-greɣ ihi tiɣri i wakken ad d-ffɣen ciṭuḥ si tuɣult tumḍint (numérique) u ad d-uɣalen ɣer tilawt ssya ɣer da, akken ad fken lweqt, amedya, i tɣuri n yedlisen d leqdic deg wayen akk izemren ad yesnerni idles-nneɣ.

 Facebook/Timuɣliwin

–*–*–*—

Kra n tuɣac n Hamid Aït Melloul deg Youtube :

1) I yitran d tziri :

Image de prévisualisation YouTube

2) Lxiq

Image de prévisualisation YouTube

 

4) Cciṭan

Image de prévisualisation YouTube

 

 

 

 

Website Stats


Counter for tumblr

« Ameslub », d adlis sɣur Xalil Ǧebran

Commentaires » 0

Ameslub, isefra-s d tengalin-is ;  d adlis umaru alubnani Xalil Ǧebran i d-yerra Samir Tighzert ɣer teqbaylit, taswiεt-a yettnuz deg lulu.com kan.

Tukkist si tezwert n umsuɣel :Ameslub

Win ara yeɣren Adlis-a taɣuri tafsisant kan, ad s-yini s tidet, yettmeslay-d ɣef yimi n ḥedd iselben, neɣ maḍi d amesllub i t-yuran ! Maca akken ara yeɣz yimeɣri s telqey deg imeslayen i d-yeddan deg-s, u ad imeḥḥeṣ deg yal awal di yal aḍris si 35-a yemgaraden, ad yaf belli yeɣleḍ deg usizref-is amezwaru, acku tamuɣli yellan deg-sen lqayet, iznen i d-ttceyyiɛen ččuren d inumak, akken yuɣ tannumi umeskar-nsen Xalil Ǧenran yettsisti-ten-id.

…..

Deg wayen yerzan Ameslub i yettwarun s tneglizit deg useggas 1918, am Nnbi, ur yeqqin ara ɣer yiwen n ṣṣenf aseklan ibanen ; yella win ara  d-yinin yesdukkel-iten akk am akken ara d-yini wayeḍ yeffeɣ-asen merra. Lḥasun tuget gar yeḍrisen-a malen ugar ɣer tmedyazt tatrart, ṭṭfen daɣ ɣer tmacahut ɣas akken tikwal ttaken lewhi ula ɣer tira tuɣrisin, imi am akken i d-yedda deg uzwel, amskar-nsen yerra kra seg-sen d tingalin, meḥsub d ayen icban tiqsiḍin timecṭaḥ i d-yettawi umdan akken ad yenhu ḥedd, ad d-yesmekti kra neɣ ad d-yawi tamsirt ɣef kra n temsalt.

Tukkisin seg udlis :

- Aqjun amusnaw

- Asmi d-tlul Lmeḥna-w

Anwa i d Xalil Ǧebran ?

Ǧebran Xalil Ǧebran d amyaru alubnani, d amedyaz, d ameklaw ; ilul ass n 06 deg yennayer 1883 di Bacari (Lubnan), yemmut ass n 10 deg yebrir 1931 di New York ; yella yettaru s taɛrabt d tneglizit maca yettwassen ugar s udlis-is Nnbi i yura  s tneglizit, ma s taɛrabt yeǧǧa-d ungalen yecban Afriwen yerrẓen ; tullisin am tid i d-yeddan deg wammud Tanekra n terwiḥin, d waṭas n tmedyazt. Ameslub i yura s tneglizit deg useggas 1918, d tallunt i yekfa i kra si tikta-s i d-yewwi s tengalin, tineqqisin neɣ s isefra.

Ameslub deg lulu.com (ttekki da)

  Facebook/Timuɣliwin

20161112_162340

 



web page hit counters codes Free

Measure Website Visitors

Asmi d-tlul Lmeḥna-w

Commentaires » 0

Sɣur Ǧebran Xalil Ǧebran

Tukkisin seg udlis :
Ameslub, isefra-s d tengalin-is
(The madman, his parabols and poems)- 1918

Tasuqilt n Samir Tighzert

 

 

Asmi d-tlul lmeḥna-w

Asmi d-tlul lmeḥna-w ssuṭḍeɣ-tt s uyefki n leḥṣan, εawzeɣ fell-as s tiṭ n tayri d leḥnana.

Dɣa tegma akken yakk igemmu kra yettidiren… tekseb ccbaḥa terna tazmert, tezga teǧǧuǧeg.

Akka ihi i ḥemmleɣ lmeḥna-w tḥemmel-iyi, nerna nḥemmel ayen i ɣ-d-yezzin di sin ; acku Lmeḥna-w tella ḥninet, d aleqqaq wul-is ; ihi ula d nekk rriɣ ul-iw d aleqqaq, uɣaleɣ daɣen d aḥnin

Nekk d Lemḥnaw, nella m’ara nettmeslay nettarra tirga d afriwen iss i ttafgen wussan-nneɣ, nettarra-tent d timura i wuḍan-nneɣ ; acku Lmeḥna-w tella tessen-as i wawal, iserreḥ yiles-is ; daymi serrḥeɣ ula d nekk i yiles-iw armi uɣaleɣ ssneɣ-as i wawal.

Nekk d Lemḥnaw, nella yal m’ara necnu ttebdaden-d lǧiran ɣer ṭṭiqan akken ad ḥessen i ccna-nneɣ, acku ccna-nni-nneɣ yella lqay am yillel, yessewham akken ssewhament ccfawat.

Nekk d lmeḥna-w, nella m’ara nleḥḥu ttḥekkiren-d deg-neɣ akk medden s wallen-nsen yetterriqen d tayri d ttewḥid, zgan la heddren fell-aɣ s kra ssnen d awal aziḍan ; maca ɣas akken, llan daɣ wid i ɣ-d-yettmuqulen s tismin, acku Lmeḥna-w tella d tin yettuqadren, daymi zgiɣ ttzuxxuɣ yess.

Syin Lmeḥna-w tuɣal temmut am akken yakk yettmattat kra yettidiren, dɣa griɣ-d weḥd-i rriɣ-tt ala i uḥebber d umeyyez.

Tura ma nniɣ-d kra ttεettibeɣ ula d imeẓẓuɣen-iw .

Akken bɣuɣ cewwqeɣ, ur yelli w’ara yi-d-iḥessen.

     Ma m’ara iliɣ tezziɣ deg iberdan, ttεeddin akk yiwen ur d-yecliε deg-i.

Dɣa d acu kan iss i ttṣebbireɣ iman-iw, d leṣwat-nni iwumi selleɣ deg targit la s-qqaren :

— Muqlet, muqlet !… dayi i yeggan wergaz-nni iwumi temmut Lmeḥna-s.

ameslub

 

Ma d asmi d-ilul lferḥ-iw…

 

Ma d asmi d-ilul lferḥ-iw, wwiɣ-t gar iɣallen-iw uliɣ sennig uxxam la ssawaleɣ qqareɣ-asen :

— A lǧiran… a kra n win ssneɣ… eyya-w ad twalim, atan ilul-d Lferḥ-iw assa ! ddut-d ad teẓrem amek i meqqer Lferḥ-iw yettaḍsan i yiṭij.

Dɣa wehmeɣ amek armi yiwen ur d-yusi ad iwali Lferḥ-iw !

………………………. (Yettkemmil)

 

 

 

 

Copyright © Samir Tighzert 2016


http://www.hitwebcounter.com/htmltutorial.php

WebPage Visits