n Samir Tighzert

Awal ɣef Don Kicuṭ n Manca n Cervantes

 Sɣur Samir Tighzert

……………………………………..

Don Kicuṭ n Manca d ungal i yura umyaru aspenyuli Miguel de Cervantes deg sin yeḥricen (amenzu deg useDon Kicuṭ n Manca akked Sancu Panzaggas 1606, wis sin deg useggas 1616). Ungal-a yettuneḥsab d win i d amezwru yakk deg tsekla tatrart ɣef leḥsab n tɣara n tira-s d wudem iss i d-yedda deg-s wullis. Yewwi-d deg-s umeskar ɣef yiwen wergaz akken bu-nneyya, iwumi qqaren Don Kicuṭ n Manca[1],  asmi iεewwl ad yeg am yemnayen iqbuṛen, imi d isaṭṭen[2] iɣef yeɣra deg tektabin. Ameskar yenna-d dɣa seg tazwara : Don Kicuṭ yeɣra yeɣra deg teqsiḍin-nni armi icuf iqerru-s, meḥsub yemxell, ihi iεedda ad yeḍfer abrid-nsen, ulamma tuɣ tεedda tallit n yicaliyen am widak.

Taddist

Akken ad yefhem yiwen taqsiṭ n Don Kicuṭ ilaq ad iẓer acu d ungalen n  « temneyt taḥewwast », anda teffɣen imnayen akken ad d-fdun wid akk yettwaḥeqren ɣas ma ur ten-ssinen, iwakken kan ad sbedden lḥeqq u ad d-beyynen tabɣest-nsen. Azgen deg-sen ttawin-ten-id  kan d timucuha deg tallit-nni tanammast, maca Don Kicuṭ i iselben si tɣuri-s, yerra-tt d tidet, iεewwel ad yeg am nutni, ad d-yerr taɣdemt i lɣaci. Yessufeɣ-d ihi aεudiw-is ihezlen akk iwumi isemma Rusinant (Rocinante s tspenyult), yekkes-d asekkin d waɣer[3] i yellan din deg uxxam tuli-ten tɣebbart seg wissen anwa zzman,  takurazt[4] d wayen akk yettiḥwiǧ umgara[5] deg lawan-nni ; syin yessawel-d i yiwen n lǧar-is yeččuren d nneyya daɣ am netta ɣas ma di leεqel-is yella, qqaren-as Sancu Panza, iḥemmel inzan aṭas, d win i yextar ad yili d amεiwen-is deg icaliyen-is, imi akken i ten-sεan yemnayen iqburen, yerna winna ɣef uɣyul i yeṭṭafar deffir.

Yuɣ lḥal imnayen iqburen i yettḥaka, yal wa tettili tin i iḥemmel, iɣef yettxemmim m’ara yili deg imennuɣen d unadi n lexlawi ; ihi ula d Don Kicuṭ yextar yiwet kan akka n tfellaḥt tameɣbunt din deg taddart, yerra-tt d tin d « tarfiqt ixemmimen-is », isem-is Dulsinya (Duclinea s tspenyult). Syin ata yebda ihi acali deg lexla, yettnadi w’ara d-isellek ; netta s nneyya-s yetthummu kan, ur yeẓri ma s tidet i yeḍra kra, ma ilaq ad d-iger iman-is neɣ ala, maca itemmeɣ ; dɣa yal tikelt yettaf yeɣleḍ deg leḥsab-is, yeggar iman-is deg wayen ur t-nerzi armi yeṛwa tiytiwin. Di tilawt, kra din yettenbeddal gar wallen-is seg wakken yuḍen, am tikelt mi yekcem deg yiwen usensu n wedrar, yufa din timesdurar yenwa-tent d yessi-s n sslaṭen ukud i ilaq ad yissin amek ara yelḥu, ihi ula d din ixelleṣ-itt. Daymi taqsiṭ-is tessaḍsay nezzeh, tugart imi aɣanib n Cervantes yebna ɣef usaran[6], ahat ulac lemtel-is deg tira. Γas in’as d ayen i t-yeǧǧan mucaε, maca yeččur daɣen d tamusni lqayen n wawal, inzan d tengalin i d-yettuɣalen daxel n wullis agejdan, ladɣa deg idewenniyen n Don Kicuṭ d Sancu Panza i yettekttiren deg wawal, acku ula d netta yettekka deg tedyanin akk i d-mmugren.

 Azal-is

Annect-a yakk yerra ungal-a  yeṭṭef amkan meqqren deg tgemmi taseklant tamḍlant, imi ula d kra n yismawen izeddiɣen kecmen deg tutlayin tuṛufiyin uɣalen d awalen n menwala, amedya deg tefransist : dulcinée (taḥbibt, taxḍibt), rocinante (aεudiw). Llant daɣ tenfaliyin i d-yekkan syin qqiment d lemtul, am m’ara s-tiniḍ yettnaɣ ḥedd d tessirin n waḍu, meḥsub yekkat deg wulac, acku teḍra-yas i Don Kicuṭ asmi d-yemmuger tissirin n waḍu s yiɣallen-nsent meqqren, iɣil d ḥedd igehguhen[7], ihi iεedda ad yennaɣ yid-sen. Syin i d-tekka tenfalin mucaεen : anuɣ d tessirin (se battre avec des moulin).

Yerna ahat izen amezwar n wungal d wa ; imi ulamma imeɣriyen n lqern wis 17 ḥesben-t tagnit kan i taḍsa d tukksa n lxiq, wid i d-iḍefren, tugart deg tallit-nni n tegrawla tafransist ; walan-t d amedya i umdan izemren ad yesεu lḥeqq weḥd-s mgal timetti  s lekmal-is. Lḥasun, ayen i d-yewwi d ayen icerken talsa merra ; ahat ad yili ḥedd ssya d asawen ara t-id-yerren ɣer teqbaylit am akken yella deg tuget n tutlayin umaḍal, maca aya d asenfaṛ meqqren, ma yefka-yas ḥedd akud yessefk ad ad ilin imeɣriyen ara t-id-yafen.

……………………………………………………………………………….

Facebook/Timuɣliwin


[1] Manca neɣ la Mancha, d tamennaṭ i d-yezgan deg tlemmast n Spanya.
[2] Asaḍ, isaṭṭen : héros.
[3] Aɣer : bouclier
[4] Si tlaṭinit koraza :  taqemǧet taqurant i ttlusun yemnayen i wanuɣ lawan-nni (cuirasse).
[5] Amgara, imgariyen : guerrier
[6] Asaran : humour
[7] Agehguh, igehguhen : deg tama n usammar n Bgayet d ayen akk meqqren yessexlaεen (aqjun, aɣzen, atg), akka i nsemma da i iεefriten igeεmiren iss i ttamnen imir deg Tuṛuft (les géants).

WebPage Visits

http://www.hitwebcounter.com/htmltutorial.php

5 août, 2017 à 2 h 03 min


Laisser un commentaire