n Samir Tighzert

Γef ungal Aɣyul n wureɣ n Ufulay (Apuleius)

Sɣur Samir Tighzert

…………………………

« Aɣyul n wureɣ » d adlis i yura umyaru amaziɣ Afulay (Apuleus) di lqern wis sin seld Talalit. Yettuneḥsab d ungal amezwaru maḍi deg umezruy n talsa. Yura-t s tlaṭinit.

Agezzul n wungal :
aɣyul nwureɣ - Asuneɣ n tallit tabiẓantit

Ullis i d-yeddan deg-s iḥekku-d ɣef yiwen ilemẓi iwumi qqaren Lusyus (d isem umaru s yiman-is) i yunagen ɣer tmurt Igrigiyen ɣef kra n ccɣel ; yuɣ lḥal Lusyus-a d awnaf aṭas, iḥemmel ad yefhem u ad imeḥḥeṣ di kra yellaun, akken i iteddu yettnadi armi yeεreḍ ad yekcem deg lumuṛ n ssḥur d wid i ten-ixeddmen, dɣa yessen-d yiwet n tmeṭṭut, d taqeddact n umdakel-is Milu uɣur yerza, tezdi-ten tayri kra n wussan deg uxxam-nni, akken armi d yiwwas teεreḍ ad t-tεiwen s ukerrer akken ad yuɣal d igider ; maca i ẓẓher amcum, yuɣal d aɣyul, ihi din i d-bdant lmertat-is d icaliyen-is n leεtab akked wid i d-yemlal gar imakaren, iqettalen, imeksawen, iεebbaden n yilluten, imeṛkantiyen d wiyaḍ ; ayen ur nfukk armi t-terra tillut Izis (d tillut tamaṣrit)  ɣer ṣṣifa-s tanaṣlit n wemdan. Deg teqsiṭ, m’akken yella deg tfekka n uɣersiw bu-rebεa iḍarren, allaɣ n Lusyus yeqqim d win n wemdan kan, daymi yessaweḍ ad d-yedlu ɣef ayen yeffren deg tmetti, cceṛ akk yettmaggan ideg ilaq ad yettekki tikwal netta s yiman-is,  yerna acḥal d abrid i yewweḍ ɣer yimi n lmut, s ẓẓher kan i imenneε. Ihi d tilufa iwumi yeḥḍer i d-yewwi deg wullis-is anda i d-yessexlaḍ tiqsiḍin d tmucuha iwumi isell daɣen ɣer wiyaḍ ssya ɣer da. Dɣa taxatart gar-asent d tin n Psici (Psyché) d Cupidu i d-iḍehren i tekelt tamezwarut deg udlis-a syin tuɣal terna ɣer tmitulugit taqburt. Aɣanib n umeskar yeččur d asaran[1] ; s kra la d-yettales, yettarra kulci ɣer yir ẓẓher i t-yeṭṭafaren anda yekka uqbel ad kfunt fell-as. Dɣa ɣer tagara yuɣal d axewni ameqqran ibedden i tillut i t-id-isellken si yir tumelt[2] i yesbur acḥal d ayyuren.

Azal-is :

Ungal-a yewwi-d ad t-issinen akk Imaziɣen imi d win i d-yesbeyyinen amur iss i ttekkan lejdud-nsen deg lebni n yidles amaḍlan s lekaml-is, ulamma s tutlayt-iḍen. Ugar n ccbaḥa n tira-s i yettaǧǧan yal amdan ad inadi ɣef laṣel-is, Afulay yella wayen i d-yessedda seg wayla-nneɣ, am ubrid i ss i d-yewwi kra n tmucuha, imi llan tura imnuda i tent-yessaẓayen ɣer tgemmi tamaziɣt n lawan-nni.


 Timuɣliwin di Facebook


[1] Humour



http://www.hitwebcounter.com/

21 juillet, 2017 à 16 h 21 min


Laisser un commentaire